中国藏文学术期刊网
您的当前位置:首页> 搜索结果
为您检索到0条匹配字符
ཀྲུང་གོའི་བོད་རིག་པའི་ཕུལ་བྱུང་བརྩམས་ཆོས།
༄༅།། དུས་རབས་བཅུ་གཉིས་ནས་བཅུ་བདུན་པར་དར་ བའི་སྨར་ཚང་བཀའ་བརྒྱུད་ཀྱི་དར་རྒུད་ལོ་ རྒྱུས་ལ་ཐོག་མར་དཔྱད་པ།
རྩོམ་པ་པ:བཀའ་འབུམ་རྒྱལ།

[ནང་དོན་གནད་བསྡུས།] བཀའ་བརྒྱུད་ཆེ་བཞི་ཆུང་བརྒྱད་ལས་ཆུང་བརྒྱད་དུ་བགྲངས་པའི་སྨར་ཚང་བཀའ་བརྒྱུད་ནི་དུས་རབས་བཅུ་གཉིས་པར་སྨར་པ་ཤེས་རབ་ཡེ་ཤེས་ཀྱིས་སྲོལ་བཏོད་པ་དང་། དུས་རབས་བཅུ་གསུམ་ནས་བཅུ་བདུན་གྱི་བར་ཏེ་ས་ཕག་སྲིད་དབང་གི་སྐབས་སུ་དར་རྒྱས་ཆེན་པོ་བྱུང་ནས་ཁམས་ཕྱོགས་ཕལ་ཆེ་བར་ཁྱབ། དུས་རབས་བཅུ་བདུན་པར་དགའ་ལྡན་ཕོ་བྲང་གི་སྲིད་དབང་བྱུང་བ་ནས་ཉམས་དམས་སུ་གྱུར། སྨར་ཚང་བཀའ་བརྒྱུད་དར་ནས་རྒུད་པར་གྱུར་པའི་ལོ་ངོ་ལྔ་བརྒྱ་ལྷག་གི་རིང་བོད་ཀྱི་སྤྱི་ཚོགས་ཁྲོད་གོ་གནས་གལ་ཆེན་བཟུང་ཡོད་པ་དང་། སྒོས་སུ་བོད་ཆུ་བཞི་སྒང་དྲུག་ཏུ་ཕྱེ་བའི་སྨར་ཁམས་སྒང་གི་ཆབ་དཔལ་རིག་གསུམ་ཐད་ནུས་པ་བླ་ན་མེད་པ་ཐོན། རྩོམ་འདིར་སྨར་ཚང་གི་འབྲེལ་ཡོད་ཡུལ་དངོས་དག་ལ་རྟོག་ཞིབ་བྱས་པའི་དཔྱད་འབྲས་དང་ལོ་རྒྱུས་ཡིག་ཆ་གཉིས་གུང་བསྒྲིགས་ཏེ་སྨར་ཚང་བཀའ་བརྒྱུད་པའི་དར་རྒུད་ལོ་རྒྱུས་དང་དེའི་རྒྱུ་རྐྱེན་ལ་དཔྱད་པ་བཏང་ཡོད།

[བརྡ་ཆད་གཙོ་བོ།] སྨར་ཚང་བཀའ་བརྒྱུད། ཤོ་དགོན་པ། ཙོམ་མདོ་དགོན་པ། སྨར་པ་ཤེས་རབ་ཡེ་ཤེས།

[ཀྲུང་གོའི་དཔེ་དེབ་དབྱེ་རྟགས།] K281

[ཡིག་ཚང་མཚན་བྱང་།] A

[རྩོམ་གྱི་གོ་རིམ་ཨང་སྒྲིག] 1002-9060-2014-03-0053-10

 

གཅིག སྨར་པ་ཤེས་རབ་ཡེ་ཤེས་དང་

སྨར་ཚང་བཀའ་བརྒྱུད་ཀྱི་བྱུང་བ།

 

དྭགས་པོ་བཀའ་བརྒྱུད་པ་ནི་བོད་བརྒྱུད་ནང་བསྟན་གྱི་གྲུབ་མཐའ་དག་ལས་དར་ཁྱབ་ཆེས་ཆེ་བའི་གྲུབ་མཐའ་ཞིག་ཡིན་ཏེ། དུས་རབས་བཅུ་གཅིག་པར་མར་མི་དྭགས་གསུམ་ཀྱིས་གྲུབ་མཐའི་སྲོལ་ཕྱེ་བ་ནས་ལོ་ངོ་ཉིས་བརྒྱ་ལྷག་གི་རིང་ལ་འཕེལ་རྒྱས་ཆེན་པོ་བྱུང་ཞིང་། བཀའ་བརྒྱུད་ཆེ་བཞི་དང་ཆུང་བརྒྱད་ལ་སོགས་པའི་ཡན་ལག་གི་རྣམ་གྲངས་མང་པོ་ཐོན། འདིར་གླེང་བའི་སྨར་ཚང་བཀའ་བརྒྱུད་ནི་བཀའ་བརྒྱུད་ཆུང་བརྒྱད་ཀྱི་གྲས་སུ་གཏོགས་ཤིང་ཕག་གྲུ་རྡོ་རྗེ་རྒྱལ་པོའི་དངོས་སློབ་སྨར་པ་ཤེས་རབ་ཡེ་ཤེས་ཀྱིས་གྲུབ་མཐའི་སྲོལ་བཏོད། དེབ་ཐེར་སྔོན་པོ་སོགས་ལས་སྨར་པ་ཤེས་རབ་ཡེ་ཤེས་ལ་དམར་པ་ཞེས་ཀྱང་བཀོད་ཡོད། ཆོས་རྗེ་སྨར་པའི་རྣམ་ཐར་དྲི་མ་མེད་པའི་འོད་ཀྱི་འཕྲེང་བ་ལྟར་ན། སྨར་པ་ཤེས་རབ་ཡེ་ཤེས་ནི་རབ་བྱུང་གཉིས་པའི་ཤིང་མོ་ཡོས་ཏེ་སྤྱི་ལོ་1135ལོར་སྨར་ཁམས་རུ་ཤོད་དགེ་རྒྱས་བྱེ་མ་ལུང་ཞེས་པར་སྐུ་འཁྲུངས་པ་དང་། དགུང་ལོ་ཉེར་གཅིག་སྟེང་རབ་ཏུ་བྱུང་ཞིང་ལོ་དེར་དབུས་སུ་བཞུད།དགུང་ལོ་ཉེར་དྲུག་པར་ཕག་གྲུ་རྡོ་རྗེ་རྒྱལ་པོ་བསྟེན་ནས་དེར་ལོ་ལྔར་བསྡད་དེ་སྔར་ཞུས་མ་མྱོང་པའི་ཆོས་ཆ་ཚང་བར་ཞུས་པ་དང་། ལྷག་པར་དུ་རྗེ་སྒམ་པོ་བ་དངོས་སུ་བརྒྱུད་པའི་བཀའ་བརྒྱུད་ཀྱི་གདམས་པ་མ་ལུས་པར་གསན།མཐར་རང་ལོ་སུམ་ཅུ་སྟེ་སྤྱི་ལོ་1164ལོར་སླར་སྨར་ཁམས་སུ་ལོག་ནས་འགྲོ་དོན་བསྐྱངས་པ་དང་། དེ་ཡང་ཐོག་མར་རི་དགོན་ཞེས་པར་ལོ་གསུམ་དང་རང་ལོ་སོ་གསུམ་སྟེ་མེ་མོ་ཕག་སྤྱི་ལོ་1167ལོར་བྲག་གཡབ་བྱམས་མདུན་ཕྱོགས་སུ་བཀྲ་ཤིས་ཤོ་དགོན་པ་བཏབ། དུས་དེ་ནས་བཟུང་བོད་ཀྱི་ཆོས་ལུགས་ལོ་རྒྱུས་ལས་སྨར་ཚང་བཀའ་བརྒྱུད་ཅེས་པའི་ཆོས་བརྒྱུད་འདི་བྱུང་།

ཆོས་བརྒྱུད་འདི་ལ་སྨར་ཚང་བཀའ་བརྒྱུད་ཅེས་ཐོགས་དོན་ནི་དར་སའི་ཡུལ་རྒྱུ་མཚན་དུ་བྱས་ནས་ཐོགས་པ་སྟེ།སྨད་མདོ་ཁམས་སྒང་དྲུག་གམ་བོད་ཆུ་བཞི་སྒང་དྲུག་དུ་ཕྱེ་བའི་སྨར་ཁམས་སྒང་གི་སར་དར་པས་ན་སྨར་ཚང་བཀའ་བརྒྱུད་ཅེས་དང་། དཔེར་ན་སྨར་པ་ཤེས་རབ་ཡེ་ཤེས་ཀྱི་བླ་མ་ཕག་གྲུ་རྡོ་རྗེ་རྒྱལ་པོས་གཙང་གི་ཕག་མོ་གྲུར་གདན་ས་བཏབ་པས་ཕག་གྲུ་བཀའ་བརྒྱུད་དང་། སྐྱོབས་པ་འཇིག་རྟེན་མགོན་པོས་འབྲི་གུང་ཁུལ་དུ་གདན་ས་བཏབ་པས་འབྲི་གུང་བཀའ་བརྒྱུད་དུ་ཐོགས་པ་སོགས་གནས་ལུགས་གཅིག་ཡིན། བོད་ཀྱི་ཆོས་འབྱུང་དེབ་ཐེར་དག་ལས་སྨར་ཚང་བཀའ་བརྒྱུད་ལ་སྨར་ཚོང་དང་སྨར་པ་བཀའ་བརྒྱུད་ཅེས་ཀྱང་བྲིས་ཡོད་པ་དང་། སྨར་ཚོང་ནི་སྒྲ་མ་དག་པ་དང་སྨར་པ་བཀའ་བརྒྱུད་ཅེས་པ་ནི་སྨར་པ་ཤེས་རབ་ཡེ་ཤེས་ཀྱི་མཚན་གདགས་གཞིར་བཟུང་ནས་བཏགས་པ་ཡིན་པས་དོན་དུ་སྨར་ཚང་དང་སྨར་པ་དོན་གཅིག་ཡིན།

སྨར་ཚང་བཀའ་བརྒྱུད་ཅེས་པའི་གྲུབ་མཐའ་ཡན་གར་བ་འདི་བྱུང་བའང་མདོར་ན་སྐབས་དེའི་སྤྱི་ཚོགས་དང་རིག་གནས་ལ་བརྟེན་པ་ཡིན་ཏེ། དུས་རབས་བཅུ་གཉིས་པ་ནི་བོད་ཁམས་སིལ་བུའི་སྐབས་ཡིན་པས་ཆོས་ལུགས་གྲུབ་མཐའ་སྤེལ་བ་ལ་ཆབ་སྲིད་ཀྱི་བཀག་སྡོམ་མེད་ཅིང་། སྒོས་སུ་བསྟན་པ་ཕྱི་དར་གྱི་མགོ་ཚུགས་ནས་ཡུན་རིང་འགོར་མེད་པས་སྤྱིའི་ཆ་ནས་ནང་བསྟན་དར་རྒྱས་ཆེན་པོར་ཕྱིན་མེད་ལ།ས་གནས་སོ་སོས་བསྟན་པ་བསྐྱར་གསོ་ལ་རེ་སྙེག་དང་རྒྱབ་སྐྱོར་ཆེན་པོ་བྱེད་པས་ག་ས་གང་དུ་ནང་ཆོས་འཛིན་སྐྱོང་སྤེལ་གསུམ་གྱི་ཁ་དབུགས་སྟུག་པོ་ཞིག་ཆགས་ཡོད། སྨར་ཁམས་ཀྱི་ཡུལ་འདིར་ཡང་བླ་མ་དབུ་སུག་པ་དང་སྒོམ་བརྒྱ་བ་སོགས་ཆོས་པ་འགའ་རེས་བུ་སློབ་བསྐྱངས་ནས་ནང་ཆོས་སྤེལ་བཞིན་པ་ནི་ཆོས་རྗེ་སྨར་པའི་རྣམ་ཐར་ལས་གསལ་བ་དང་། ཡང་གྲུབ་ཐོབ་ཉག་རེ་སེ་པོ་ལྟ་བུའི་ཕག་གྲུའི་ཆོས་བརྒྱུད་འཛིན་པའི་མཁས་གྲུབ་ཀྱང་བྱུང་ཡོད། གཞན་སྨར་པའི་རྣམ་ཐར་ལས། སྨར་པ་ཤེས་རབ་ཡེ་ཤེས་བླ་མ་ཕག་གྲུའི་མདུན་ནས་ལོ་ལྔར་བཞུགས་པའི་ཚེ་ཁམས་ནས་སུན་རྟ་འབྱོར་ནས་ཁམས་སུ་བྱོན་པར་བབས་ཞེས་པ་དང་། ཡང་རྣམ་ཐར་ལ་ལར་ཁམས་ནས་ཕེབས་བསུ་ལ་འོངས་ནས་ཁམས་སུ་ལོག་ཅེས་པ་ལས་སྐབས་དེར་ཁམས་ཕྱོགས་སུ་ཆོས་ལུགས་དར་སྤེལ་བྱེད་པ་ཤིན་ཏུ་གཙིགས་སུ་འཛིན་བཞིན་པ་དང་། ལྷག་དོན་སྨར་པ་ཤེས་རབ་ཡེ་ཤེས་ནི་སྨར་ཁམས་ནས་ཡིན་པས་རང་ཡུལ་དུ་ཆོས་ལུགས་སྤེལ་བ་ལ་དགའ་བསུ་ཆེན་པོ་བྱེད་བཞིན་པ་རྟོགས།

སྨར་པ་ཤེས་རབ་ཡེ་ཤེས་ཀྱིས་སྨར་ཁམས་སུ་ཆོས་བརྒྱུད་སྤེལ་བ་ལ་མདོར་ན་རྒྱུ་རྐྱེན་གསུམ་ལྡན་པ་སྟེ། དང་པོ། ཁོང་གི་ཆོས་བརྒྱུད་སྤེལ་བ་ལ་ཡུལ་དུས་གང་གི་ཆ་ནས་ཀྱང་མཐུན་རྐྱེན་ལེགས་པོ་འཛོམས་ཡོད། དུས་ཀྱི་ཆ་ནས་བོད་ཁམས་སིལ་བུར་འཐོར་ནས་ས་ཕྱོགས་ཀུན་ཏུ་ཆོས་ལུགས་དར་སྤེལ་དང་གྲུབ་མཐའ་གསར་འབྱེད་ཀྱི་ཚ་རླབས་ཤིག་འཕྱུར་ཡོད་པ་དང་། ཡུལ་གྱི་ངོས་ནས་སྨར་ཁམས་ཏེ་རང་གི་འཁྲུངས་ཡུལ་དུ་གྲུབ་མཐའ་སྐྱོང་པ་ནི་ཡུལ་གྲུ་གཞན་ལས་ཕྱོགས་གང་ཐད་ནས་སྟབས་བདེ་བ་ཡིན། གཉིས་པ། དུས་སྐབས་དེར་ཕག་གྲུ་རྡོ་རྗེ་རྒྱལ་པོས་རང་གི་བུ་སློབ་དག་ས་ཕྱོགས་སོ་སོར་མངགས་ནས་གྲུབ་མཐའ་རྒྱ་བསྐྱེད་བཞིན་པ་དང་། སྨར་པ་ཤེས་རབ་ཡེ་ཤེས་ཀྱང་དེ་བཞིན་ཁོའི་འཁྲུངས་ཡུལ་སྨར་ཁམས་སུ་མངགས་ནས་ཆོས་བརྒྱུད་སྤེལ་བའང་མདོར་ན་ཕག་གྲུ་བཀའ་བརྒྱུད་ཀྱིས་སྨར་ཁམས་ཀྱི་ས་ཆ་བདག་ཏུ་བཟུང་བ་དང་། བཀའ་བརྒྱུད་ཆུང་བརྒྱད་སོགས་ཀྱི་ནང་གསེས་མང་པོ་བྱུང་པའང་ཕག་གྲུ་བཀའ་བརྒྱུད་རྒྱ་བསྐྱེད་པའི་མཚོན་རྟགས་སམ་གྲུབ་འབྲས་ཤིག་ཡིན། གསུམ་པ། གོང་དུ་སྨྲས་པ་ལྟར་སྨར་པ་ཤེས་རབ་ཡེ་ཤེས་ཀྱིས་སྨར་ཚང་བཀའ་བརྒྱུད་ཀྱི་སྲོལ་བཏོད་པ་དེས་ཕག་གྲུ་བཀའ་བརྒྱུད་ཁྱབ་སྤེལ་བྱེད་པ་ལ་ནུས་པ་ཆེན་པོ་ཐོན་པ་དང་། དེས་ཕྱིས་སུ་བྱུང་བའི་ཕག་གྲུའི་སྲིད་དབང་ལའང་ནུས་པ་ཆེན་པོ་ཐོན་ཡོད་པའོ།།

གཉིས་པ། ས་ཕག་དུས་སུ་འཕེལ་རྒྱས་ཆེན་

པོ་བྱུང་ཚུལ་དང་དེའི་རྒྱུ་རྐྱེན།

 

སྤྱི་ལོ་1264ནས་1619ལོའི་བར་ཏེ་ལོ་ངོ་སུམ་རྒྱ་ལྷག་གི་རིང་ལ་བོད་ཁམས་ཡོངས་སུ་ས་སྐྱ་དང་ཕག་གྲུ་གཉིས་ཀྱིས་དབང་བསྒྱུར་པ་དེ་ནས་བཟུང་བོད་ཀྱི་ཆོས་སྲིད་ཟུང་འབྲེལ་གྱི་ལམ་ལུགས་དངོས་སུ་བྱུང་ཞིང་བར་སྐབས་ཤིག་ལ་ཆོས་དང་འཇིག་རྟེན་གང་གི་ཆ་ནས་ཀྱང་འཕེལ་རྒྱས་ཆེན་པོ་བྱུང་། སྒོས་སུ་ཆོས་ལུགས་རིག་གནས་ནི་བོད་ཀྱི་ལོ་རྒྱུས་སྟེང་འཕེལ་རྒྱས་ཀྱི་རྩེར་བསྙེགས་པའི་དུས་ལ་སླེབས། དུས་སྐབས་འདིའི་རིང་ལ་སྨར་ཚང་བཀའ་བརྒྱུད་ཀྱང་འཕེལ་རྒྱས་ཆེན་པོ་བྱུང་ཡོད་དེ། དུས་རབས་བཅུ་གཉིས་པར་སྨར་པ་ཤེས་རབ་ཡེ་ཤེས་ཀྱིས་གདན་ས་ཤོ་དགོན་པ་བཏབ་རྗེས་དེ་གར་བུ་སློབ་སྟོང་ཕྲག་གཉིས་ལྷག་འདུས་ནས་ཆོས་བརྒྱུད་འདི་དར་སྤེལ་དང་ཉམས་ལེན་བྱས་ཞེས་འགོས་ལོའི་དེབ་སྔོན་དང་སྨར་ཚང་གི་རྣམ་ཐར་ཀུན་ལས་གསལ་ལ། ཡང་སྨར་པ་ལ་སློབ་བུ་འགྲོ་མགོན་རིན་ཆེན་དཔལ་དང་ཡང་དགོན་ཡེ་ཤེས་རྒྱལ་མཚན། སྤྱན་སྔ་བ་བྱང་ཆུབ་གྲགས་པ། དགེ་བཤེས་ཆོས་ཀྱི་ཡེ་ཤེས་སོགས་ཡོན་ཏན་གྱི་རྩེར་སོན་པ་མང་པོ་ཡོད་པ་ལས། འགྲོ་མགོན་རིན་ཆེན་དཔལ་གྱིས་རབ་བྱུང་གསུམ་པའི་ལྕགས་ཕོ་སྤྲེལ་སྟེ་སྤྱི་ལོ་1200ལོར་ཙོམ་མདོ་གནས་གསར་གཙུག་ལག་ཁང་ཕྱག་བཏབ་པ་དང་། དེར་དགེ་འདུན་བརྒྱ་ཕྲག་བཅུ་གསུམ་ལྷག་འདུས་ཏེ་སྨར་ཚང་བཀའ་བརྒྱུད་ཀྱི་གདན་ས་གཉིས་པར་གྱུར། དེར་མཐུད་སྨར་ཁམས་ཀྱི་ཕྱོགས་འདིར་སྨར་ཚང་བཀའ་བརྒྱུད་དར་རྒྱས་ཆེན་པོ་བྱུང་བ་དང་གདན་ས་གཉིས་ལ་ཤོ་ཙོམ་ཉི་ཟླ་ཟུང་འབྲེལ་ཞེས་མཚན་སྙན་ཆེན་པོ་རྒྱས། དེ་དང་བསྟུན་ནས་སྨར་ཚང་བཀའ་བརྒྱུད་ཀྱི་གྲུབ་མཐའ་རྒྱ་བསྐྱེད་པའི་ཚུལ་ནི། ཙོམ་མདོ་གདན་རབས་ཀུན་བཏུས་ལས། ཆོས་རྗེ་སྨར་པས་ཕྱག་བཏབ་པའི་དགོན་བཅོ་ལྔ། འགྲོ་མགོན་གྱིས་དགོན་ཡན་ལག་བདུན་ཅུ་རྩ་གཅིག་ཕྱག་བཏབ། ཆོས་རྗེ་རིན་ཆེན་རྒྱལ་མཚན་གྱིས་དགོན་བདུན་ཕྱག་བཏབ། ཆོས་རྗེ་དཀོན་མཆོག་རྒྱལ་མཚན་གྱིས་དགོན་བརྒྱད་ཕྱག་བཏབ།ཆོས་རྗེ་དཀོན་མཆོག་རྡོ་རྗེས་དགོན་གསུམ་ཕྱག་བཏབ།  གདན་ས་གཉིས་ཀྱི་བསྟན་པའི་ཆུ་བོའི་བརྒྱུད་ནི། སྨད་རྒྱལ་རོང་། འཇང་ས་ཐང་། རོང་ཁ་བ་དཀར། ཚ་བ་རོང་། མི་ཉག ལི་ཐང་། འབའ་ཐང་། གོ་བོ་རོང་། གོ་ཇོ། བྲག་གཡབ། དཔལ་ཡུལ། པདྨ་ཀོ གནས་ཙ་རི། ཀོང་པོ་སོགས་ལ་དར་ཁྱབ་ཆེ་བ་བྱུང་། ཞེས་པ་ལས་སྨར་ཚང་གི་མཁས་གྲུབ་མང་པོས་དགོན་སྡེ་བཏབ་ནས་ཆོས་བརྒྱུད་སྤེལ་བ་གསལ་པོར་མཐོང་ཞིང་། ལྷག་པར་དུ་སྨར་ཚང་གི་བསྟན་པ་འདི་སྨར་ཁམས་ལས་བརྒལ་ཏེ་ཉེ་འཁོར་གྱི་ས་ཆ་མང་པོར་དར་བ་རྟོགས། འབྲེལ་ཡོད་ཡིག་ཆ་ལས་དགོན་པ་དེ་དག་དུས་ནམ་ཞིག་ལ་བཏབ་པ་གསལ་པོར་བཀོད་མེད་ནའང་། དམ་པ་དག་གི་རྣམ་ཐར་ལ་ཞིབ་པར་གཞིགས་ཚེ་དུས་རབས་ནམ་ཞིག་ལ་ཡིན་པ་གསལ་པོར་ངེས། ཆོས་རྗེ་སྨར་པའི་རྣམ་ཐར་ལས་དགོན་པ་དེ་དག་ཕྱག་བཏབ་པའི་སྐོར་བཀོད་མེད་ཀྱང་། སྤྱི་ལོ1167ལོར་གདན་ས་ཤོ་དགོན་པ་བཏབ་རྗེས་དགོན་གཞན་དག་བཏབ་པ་ནི་རིགས་པས་གྲུབ། “འགྲོ་མགོན་རིན་ཆེན་གྱིས་སྤྱི་ལོ་1203ལོར་ཆོས་རྗེ་སྨར་པ་སྐུ་གཤེགས་རྗེས་དགོན་པ་མང་པོ་བཏབ་པ་ནི་ཁོང་གི་རྣམ་ཐར་ལས་འདི་ལྟར་བཀོད་ཡོད་དེ། འགྲོ་མགོན་རིན་ཆེན་ལྷ་འདུས་ལ་བཞུགས་རིང་ལ། ཆོས་རྗེ་སྨར་པ་རིན་པོ་ཆེ་དགོངས་པ་ཆོས་ཀྱི་དབྱིངས་སུ་གཤེགས། ཞེས་ཤོ་དགོན་གྱི་བང་མི་འབྱོར། འགྲོ་མགོན་རིན་པོ་ཆེ་སླར་ཤོ་དགོན་དུ་བྱོན། དགོངས་རྫོགས་ཀྱི་མཆོད་སྤྲིན་རྒྱ་ཆེར་ཕུལ། ཆོས་རྗེ་སྨར་པའི་སྐུ་བརྙན་ཐོག་ཕྱེད་མ་ཞིག་བཞེངས། ཆོས་རྗེའི་གསུང་རྣམས་ཕྱོགས་གཅིག་ཏུ་ཤིང་སྤར་བརྐོས། ཡང་དགོན་ཡེ་ཤེས་རྒྱལ་མཚན་ཤོ་དགོན་གྱི་ཁྲི་པ་བསྐོས། རྟེན་འབྲེལ་གྱི་མཛད་སྒོར་རྒྱ་ཆེར་མཛད། སླར་ཡང་ལྷ་འདུས་ལ་བྱོན་ནས་ལས་རིམ་མཇུག་སྒྲིལ། བྲག་འགོ་དགོན། རྒྱ་གཉེན་དགོན།རོང་དགོན་བཅས་བཏབ། དགོན་རེ་ལ་རབ་ཏུ་བྱུང་བ་བཅུ་ཕྲག་ལྔ་རེ་ཙམ་བྱུང་། ཞེས་དགོན་འདི་དག་ནི་སྨར་པ་ཤེས་རབ་ཡེ་ཤེས་སྐུ་གཤེགས་པའི་ལོར་བཏབ་པ་གསལ་པོར་མཐོང་། དེར་མཐུད་ཡང་ཁོང་གི་རྣམ་ཐར་ལས། “ལམ་དུ་འགྲོ་མགོན་རིན་པོ་ཆེ་སྨར་སྟོད་ཙོང་ཤོད་ལ་བྱོན། ཙོང་སྨད་བྱང་ཆུབ་དགོན་དང་། ཙོང་སྟོད་འབུམ་དགོན་གཉིས་བཏབ། ཞེས་དང་། ཡང་། “འགྲོ་མགོན་རིན་ཆེན་དཔལ་ཚྭ་ཁའི་བརྒྱུད་ས་ཁ་བ་དཀར་པོར་བྱོན། འགྲོ་མགོན་བཞུད་ལམ་དུའང་། ཝ་དུང་དགོན་སོགས་དགོན་ཆེ་ཕྲ་དུ་མ་བཏབ། དད་ཚད་ཀྱི་འགྲོ་བ་ཐམས་ཅད་ཐར་པའི་ས་ལ་བཀོད། ཁ་བ་དཀར་པོ་དང་ཉེ་བའི་མཆོད་རྟེན་དཀར་ཆུང་གི་རི་རྩེར་ཇོ་བོ་དང་དེའི་ལྷ་ཁང་ཡང་བཞེངས། ལྷ་ཁང་ལ་ནམ་མཁའ་བཀྲ་ཤིས་ཞེས་མཚན་གསོལ། ལོ་སྨད་དགོན།རོང་དགོན། ཀོལ་ཁྲོམ་དགོན། འདོར་བཟང་དགོན་ཞེས་ཀྱང་བཏབ། ཅེས་ཁོང་གིས་དགོན་པ་མང་པོ་བཏབ་པ་ཡོངས་སུ་ཆོས་རྗེ་སྨར་པའི་རྗེས་སུ་སྟེ་དུས་རབས་བཅུ་གསུམ་པའི་སྟོད་ལ་བཏབ། ཡང་ཙོམ་མདོའི་ཁྲི་རབས་དྲུག་པ་ཆོས་རྗེ་རིན་ཆེན་རྒྱལ་མཚན་གྱི་རྣམ་ཐར་ལས། “ཆོས་རྗེ་རིན་ཆེན་རྒྱལ་མཚན་ཁ་བ་དཀར་པོར་བཞུད། དིབ་ཆུ་ནག་པོ་འདུལ། བསྟན་པའི་བྱེད་སྒོར་རྒྱ་ཆེར་སྤེལ། རྟག་གཟིག་རྒྱལ་པོའི་ལོངས་སྤྱོད་ཐམས་ཅད་ཕུལ། རྟག་གཟིག་ནོར་སྣང་མང་པོ་བྱུང་། ལོ་སྨད་དགོན། རོམ་དགོན། ཀོལ་ཕྲོམ་དགོན། འདོར་བཟང་དགོན། དཔལ་འཛོམ་དགོན། ཚེ་དུ་མཛོ། རྦ་མདོ་དགོན། བཅུ་འགོ་དགོན། དོལ་ཀར་དགོན།རོལ་ཐོ་དགོན། རྒྱལ་དགོན་རྣམས་སུ་བཞུད། དགོན་ཐམས་ཅད་ལ་ཆོས་ཀྱི་སྦྲང་ཆར་ཕབས། གོང་མ་འགྲོ་མགོན་(འགྲོ་མགོན་རིན་ཆེན་དཔལ་)བཞིན་དུ་གཟིགས་སྲོལ་གནང་།ཞེས་བཀོད་ཡོད་པ་ལས་དགོན་འདི་དག་ཀྱང་འགྲོ་མགོན་རིན་ཆེན་གྱིས་བཏབ་པ་གསལ་པོར་རྟོགས།གོང་དུ་གླེང་བའི་ཙོམ་མདོའི་ཁྲི་རབས་དྲུག་པ་ཆོས་རྗེ་རིན་ཆེན་རྒྱལ་མཚན་གྱིས་དགོན་བདུན་ཕྱག་བཏབ་ཅེས་པ་ལས་དུས་ནམ་ཞིག་ལ་བཏབ་པ་བཀོད་མེད་ཀྱང་། ཁོང་གི་རྣམ་ཐར་ལ་ཞིབ་པར་གཞིགས་ཚེ་ཙོམ་མདོའི་ཁྲི་བ་བཞེས་རྗེས་བཏབ་པ་ཡིན་ལ། དེ་ལྟར་ན་དུས་རབས་བཅུ་གསུམ་པའི་སྨད་དམ་དུས་རབས་བཅུ་བཞི་པའི་སྟོད་ལ་འཁེལ་ཡོད།གཞན་ཡང་ཆོས་རྗེ་དཀོན་མཆོག་རྒྱལ་མཚན་ནི་ཙོམ་མདོའི་ཁྲི་རབས་དགུ་པ་དང་ཁོང་གི་རྣམ་ཐར་ལས་དགུང་ལོ་ལྔ་བཅུའི་རྗེས་སུ་ཙ་རི་དང་ཀོང་པོ་སོགས་ནས་དགོན་པ་བཏབ་ཅེས་བཀོད་ཡོད་པས། ཁོང་གིས་ཕྱག་བཏབ་པའི་དགོན་བརྒྱད་པོའང་དུས་རབས་བཅུ་བཞི་པའི་སྨད་ལ་བཏབ་པ་ཤེས། ཆོས་རྗེ་དཀོན་མཆོག་རྡོ་རྗེ་ནི་ཙོམ་མདོའི་ཁྲི་རབས་བཅུ་གཉིས་པ་དང་ཁོང་གི་རྣམ་ཐར་ལྟར་ན་དགོན་པ་དེ་དག་དུས་རབས་བཅོ་ལྔ་པའི་སྟོད་ལ་བཏབ་པ་ཡིན།དེ་བཞིན་གོང་དུ་གླེང་པའི་སྨར་ཚང་གི་མཁས་གྲུབ་རིམ་བྱོན་གྱིས་ཁྱོན་སྡོམ་དགོན་པ་བརྒྱ་ཕྲག་ལྷག་བཏབ་པ་དག་དུས་རབས་བཅུ་གཅིག་ནས་བཅོ་ལྔ་པར་བྱུང་བ་གྲུབ། ཡང་དེབ་ཐེར་སྔོན་མོ་ལས། “ཁམས་སུའང་ཆོས་རྗེ་དམར་བས་ཤོ་དགོན་བཏབ་པ་ལས་ཚོགས་པ་ཉིས་སྟོང་ཙམ་འདུས་ཤིང་། ཆོས་རྗེ་དམར་བའི་རྗེས་སུ་ཤ་ཡང་དགོན་པ། རྨོག་སྤྱན་སྔ་རིན་པོ་ཆེ། ཤ་དབུ་རྩེ་བ། རྣལ་རིན་ཆེན་གླིང་པ་ལ་སོགས་ཁྱད་འཕགས་མང་དུ་བྱོན། དེ་ལས་བརྒྱུད་པའི་བུ་ཆེན་ཡང་སྒི་ལི་ཆོས་འོད་ཀྱིས་རི་རྒྱ་དགོན་བཏབ། དེའི་དགོན་ལག་རྒྱལ་དགོན་ལ་སོགས་མང་དུ་ཡོད།ཅེས་བཀོད་ཡོད་པ་དང་། སྒི་ལི་ཆོས་འོད་ནི་ཤོ་དགོན་པའི་གདན་རབས་བདུན་པ་དང་། ཁོང་གི་རྣམ་ཐར་ལྟར་ན་རབ་བྱུང་དྲུག་པའི་ས་སྟག་སྟེ་སྤྱི་ལོ་1338ལོར་ཤོ་དགོན་གྱི་གདན་ས་བཟུང་བས། ཁོང་གིས་ཕྱག་བཏབ་པའི་རི་རྒྱ་དགོན་ཞེས་པ་དང་དེའི་དགོན་ལག་དག་ཀྱང་དུས་རབས་བཅུ་བཞི་པའི་དུས་དཀྱིལ་ལམ་རྗེས་སུ་བྱུང་བ་ཤེས།

གོང་གསལ་ལས་སྨར་ཚང་བཀའ་བརྒྱུད་ནི་དུས་རབས་བཅུ་གཉིས་ནས་བཅོ་ལྔ་པའི་བར་དུ་དར་རྒྱས་ཆེན་པོ་བྱུང་སྟེ་ཡུལ་ལུང་མང་པོར་ཁྱབ་ཡོད་པ་བདེན་པར་གྲུབ་ཅིང་། དུས་སྐབས་དེ་ནི་བོད་ཀྱི་ལོ་རྒྱུས་ལས་ས་ཕག་སྲིད་དབང་གི་སྐབས་ལ་འཁེལ་ཡོད། ས་སྐྱ་བས་བོད་ཀྱི་སྲིད་དབང་བཟུང་རྗེས་བཀའ་བརྒྱུད་པ་དང་འགལ་བ་ཅུང་ཟད་བྱུང་ཞིང་།སྒོས་སུ་སྤྱི་ལོ་1290ལོར་འབྲི་གུང་གླེང་ལོག་ཅེས་པའི་འཁྲུག་རྩོད་བྱུང་པ་དེས་འབྲི་གུང་ལུགས་འཛིན་གྱི་དགོན་སྡེ་མང་པོ་ས་སྐྱར་བསྒྱུར་པ་དང་། ས་པཎ་གྱི་སྡོམ་གསུམ་རབ་དབྱེ་ལས་བཀའ་བརྒྱུད་ལ་དགག་པ་སོགས་ས་སྐྱ་དང་བཀའ་བརྒྱུད་གཉིས་ལ་ཆུང་ལྟ་དགོངས་ནས་ཆེ་གཡུལ་འཁྲུག་གི་འགལ་བ་སྣ་མང་བྱུང་ཡོད། དེ་གཉིས་བར་གྱི་འགལ་བ་ནི་ཐོག་མར་གྲུབ་མཐའ་སོ་སོའི་ཁེ་ཕན་ལས་བྱུང་བ་སྟེ།སྐབས་དེར་ས་སྐྱ་དང་བཀའ་བརྒྱུད་གཉིས་ཀ་དུས་མཉམ་ངང་དབུས་གཙང་དུ་དར་བས་ཕྱོགས་གཉིས་ཀ་ནས་གྲུབ་མཐའ་དར་སྤེལ་བྱེད་པ་ལ་ཕན་ཚུན་གནོད་རྐྱེན་ཐེབས་པ་དང་། དེ་ཟློག་པའི་ཆེད་དུ་ཕན་ཚུན་དབར་འགལ་བ་མང་པོ་བྱུང་། འོན་ཀྱང་སྨར་ཚང་བཀའ་བརྒྱུད་ནི་སྐབས་དེར་སྨར་ཁམས་ཕྱོགས་སུ་གནས་ཤིང་ས་སྐྱས་གྲུབ་མཐའ་སྤེལ་བ་ལ་གནོད་འགལ་མེད་པ་དང་། ཡང་སྨར་ཚང་དང་ས་སྐྱ་གཉིས་ཀ་སྐབས་དེར་མཚན་སྙན་ཆེན་པོ་རྒྱས་ཡོད་པས་ཕན་ཚུན་འགྲོ་འོང་གི་འབྲེལ་བའང་ལེགས་པོ་བཙུགས་ཡོད་དེ།ས་པཎ་ནང་སར་ཕེབས་སྐབས་སྨར་ཚང་ཤོ་དགོན་ལ་སྔ་ཕྱིར་འཕྲིན་ཡིག་གཉིས་སྤྲིངས་པ་དང་། སྒོས་སུ་འགྲོ་མགོན་རིན་ཆེན་དཔལ་ལ་སྤྲིངས་པའི་ཡི་གེ་ལས་འདི་ལྟར་གསུངས་ཡོད།སླད་མ་ངེད་ལ་ཧོར་གྱི་རྒྱལ་པོས་བླ་མཆོད་ལ་འོང་དགོས་བྱ་བའི་གདན་འདྲེན་ནན་ཅན་ཡང་ཡང་བྱུང་བས་ད་ལོ་འགྲོ་བ་ལགས། ཁྱེད་ཀྱིས་ཀྱང་རྒྱལ་པོའི་བླ་མཆོད་རྒྱུ་དང་། མི་གོ་ཆོད་འགའ་འདབ་ནོར་དང་ངེད་ཀྱི་ཟླ་ལ་བཏང་ནས་རྒྱལ་པོའི་གསེར་ཡིག་དང་འཇའ་ས་ཞུས་ན་ངོ་ལྟ་བརྟན་པ་ཡིན་པས་ཐུགས་ལ་འཐད་ན་ངེས་རོགས་ལྡན་གང་དགོས་བྱེད་པ་ལགས། ཞེས་སྨར་ཚང་བཀའ་བརྒྱུད་པས་མི་རྒྱུ་མངགས་ནས་གོང་མར་འཇའ་ས་དང་གསེར་ཡིག་སློང་བར་སྐུལ་བ་དང་། དེ་ལྟར་ན་ཆོས་སྡེ་བརྟན་པོ་ཡོང་ངེས་ཞེས་ནན་གྱིས་གསུངས་ཡོད་ལ། གཞན་ཡང་ས་པཎ་གྱིས་ཤོ་དགོན་གྱི་དགེ་འདུན་རྣམས་ལ་སྤྲིངས་པའི་ཡི་གེ་ལས། “ཁམས་ཀྱི་ཡུལ་འདིར་སངས་རྒྱས་ཀྱི་བསྟན་པ་རྒྱས་པ་ལ་སྨར་ཚང་གི་དགེ་འདུན་ཡོངས་ནས་འབད་དགོས་ཞེས་སྐུལ་སློང་མཛད་པ་དག་ལས་སྨར་ཚང་བཀའ་བརྒྱུད་ནི་སྐབས་དེར་རང་བཞིན་གྱི་གྲུབ་མཐའ་ཆུང་ངུ་ཞིག་མིན་པ་རྟོགས་ཐུབ། ཁོང་གིས་འཕྲིན་ཡིག་སྤྲིངས་ནས་སྨར་ཚང་གི་བསྟན་པ་ལ་ཐུགས་ཁྲལ་བྱེད་པ་ལས་དེ་གཉིས་བར་འབྲེལ་བ་ལེགས་པོ་ཡོད་པའང་མཚོན། ས་པཎ་རྒྱ་ནང་དུ་ཕེབས་དུས་ཀྱང་གདན་ས་ཤོ་དགོན་བརྒྱུད་ནས་ཕེབས་པ་ནི་སྨར་ཚང་གི་རྣམ་ཐར་དག་ལས་གསལ་ལ། ཁོང་གི་འཕྲིན་ལྟར་སྨར་ཚང་འགྲོ་མགོན་རིན་ཆེན་གྱིས་མི་ནོར་མངགས་སྟེ་གོང་མར་གསེར་ཡིག་དང་འཇའ་ས་ཞུས་པ་ནི་འབྲེལ་ཡོད་ཡིག་ཚང་དག་ལས་མི་གསལ།དཔལ་ལྡན་སྨར་པ་བཀའ་བརྒྱུད་ཀྱི་རྣམ་ཐར་སུ་ཁར་རྞའི་ཕྲེང་བ་ལས་སྤྱན་སྔ་བ་བྱང་ཆུབ་གྲགས་པའི་རྣམ་ཐར་ནང་། སྤྱན་སྔ་བས་ས་སྐྱ་པཎ་ཆེན་ཧོར་ཡུལ་དུ་བྱོན་པ་ལ་ཆབ་ཤོག་དང་སྐྱེལ་རྫོང་རྒུན་འབྲུམ་སོགས་ཕུལ་ཞེས་དང་། ཡང་། “ཧོར་རྒྱལ་པོས་གསེར་གྱི་སྒྲོམ་བུ། གླང་ཆེན་མཆེ་བ་ར་རྣའི་ཕྲ་རྒྱན་ཅན་བསྐུར་ནས་སྨོན་ལམ་ཞུས།  རྒྱལ་བུས་དངུལ་བྲེ་ཆེན་ན་བཟའ་ཕྱིང་མང་པོ་བསྐུར་བ་སོགས་ཆེ་རྒུ་རྣམས་ཀྱིས་ངང་གིས་བསྙེན་བསྐུར་བྱུང་།བོད་ཀྱི་ཆེན་པོ་རྣམས་ཀྱིས་གསེར་དངུལ་གྱིས་བཞེངས་པའི་གསུང་རབ་པུ་ཏྭི་ཏ་བརྒྱ་ཕྲག་མང་པོ་ཕུལ། ཞལ་སློབ་གཞན་དོན་གདུལ་བྱ་སྨིན་གྲོལ་མཛད་པའི་སྐྱེས་བུ་དམ་པ་གྲངས་མེད་པ་བྱུང་།ཞེས་པ་ལས་ཤོ་དགོན་པའི་ཁྲི་རབས་གསུམ་པ་སྤྱན་སྔ་བྱང་ཆུབ་གྲགས་ཀྱི་རིང་ལ་ཐོག་མར་ཡོན་གོང་མ་དང་འབྲེལ་བ་བཙུགས་ཤིང་སྨར་ཚང་གི་གྲུབ་མཐའ་རྒྱ་བསྐྱེད་པར་ཡོན་གོང་མས་ཀྱང་རྒྱབ་སྐྱོར་བྱེད་པ་དང་། དེར་བསྟུན་སྤྱན་སྔ་བྱང་ཆུབ་གྲགས་ལ་བོད་ཁམས་སུ་ངོ་སོ་ཆེན་པོ་རྒྱས་ཤིང་སྨར་ཚང་བཀའ་བརྒྱུད་ལ་བོད་ཀྱི་སྤྱི་ཚོགས་ཁྲོད་གོ་གནས་ཆེན་པོ་ཡོད་པ་མཚོན། མདོར་ན་འདི་ལས་སྨར་ཚང་བཀའ་བརྒྱུད་འཕེལ་རྒྱས་སུ་འགྲོ་བ་ལ་ཡོན་གོང་མ་དང་ཡང་འབྲེལ་བ་ཆེན་པོ་ཡོད་པ་རྟོགས།

སྤྱི་ལོ་1354ལོར་ཕག་གྲུ་བྱང་ཆུབ་རྒྱལ་མཚན་གྱིས་བོད་ཀྱི་སྲིད་དབང་བཟུང་རྗེས་སྤྱི་ཚོགས་དང་རིག་གནས་གང་གི་ཆ་ནས་ཀྱང་སྔར་ལས་དར་རྒྱས་ཆེན་པོ་བྱུང་བ་དང་། བོད་ཀྱི་ལོ་རྒྱུས་ལས་འདི་ལ་རྒན་མོ་གསེར་འཁུར་གྱི་དུས་ཞེས་བཏགས་ཡོད། སྐབས་དེར་བོད་ཡོངས་སུ་སྤྱི་ཚོགས་བདེ་འཇགས་དང་རིག་གནས་གུ་ཡངས་པ་སོགས་ཀྱིས་ཆོས་ལུགས་གྲུབ་མཐའ་མང་པོ་དར་ཞིང་རྒྱས་པར་གྱུར་ལ། སྨར་ཚང་བཀའ་བརྒྱུད་ཀྱང་སྐབས་དེར་མ་ཉམས་གོང་འཕེལ་དུ་གྱུར་ཡོད་པ་ནི་གོང་གི་སྨར་ཚང་བཀའ་བརྒྱུད་ཀྱི་འཕེལ་རིམ་ལས་གསལ། སྒོས་སུ་སྨར་ཚང་གི་ཆོས་བརྒྱུད་འདིའང་ཕག་གྲུ་བཀའ་བརྒྱུད་ལས་མཆེད་པ་ཡིན་ལ། དེ་དར་རྒུད་གང་དུ་གྱུར་པ་ནི་ཕག་གྲུ་བཀའ་བརྒྱུད་ཀྱི་དར་རྒུད་ལའང་རག་ལས་པ་དང་། སྒོས་སུ་ཕག་གྲུའི་སྲིད་དབང་སྲ་བརྟན་ཡོང་བ་ལའང་འབྲེལ་བ་ཆེན་པོ་ཡོད་པས། སྨར་ཚང་བཀའ་བརྒྱུད་དར་རྒྱས་སུ་གྱུར་པ་ནི་ཕག་གྲུའི་སྲིད་དབང་དང་ཡང་འབྲེལ་བ་ཆེན་པོ་ཡོད་པར་སེམས།

 

གསུམ་པ། དགའ་ལྡན་ཕོ་བྲང་གི་དུས་སུ་

ཉམས་ཚུལ་དང་དེའི་རྒྱུ་རྐྱེན།

 

ཕག་གྲུའི་སྲིད་སྐྱོང་དགུ་པ་སྤྱན་སྔ་ངག་གི་དབང་པོས་(སྤྱི་ལོ་1448-1490)ཕག་གྲུའི་སྲིད་དབང་བཟུང་བའི་སྐབས་སུ་ཏཱ་སི་ཏུ་བྱང་ཆུབ་རྒྱལ་མཚན་གྱིས་བཀོད་པའི་སྒྲིག་སྲོལ་དང་མ་བསྟུན་པར་ཁྱིམ་དུ་ཕབ་ཅིང་། རིན་སྤུངས་པའི་སྲས་མོ་ཞིག་བཙུན་མོར་བླངས་ནས་སྲས་ངག་དབང་བཀྲ་ཤིས་གྲགས་པ་འཁྲུངས། སྤྱན་སྔ་ངག་གི་དབང་པོ་སྐུ་གཤེགས་རྗེས་སྲིད་དབང་ཁོང་གི་སྲས་ངག་དབང་བཀྲ་ཤིས་གྲགས་པ་ལ་གཏད། འོན་ཀྱང་སྐབས་དེར་སྲས་ངག་དབང་བཀྲ་ཤིས་གྲགས་པ་ལོ་ན་གཞོན་པས་སྲིད་སྐྱོང་གི་འགན་མི་ཐེགས་པ་དང་། དེར་དམིགས་རིན་སྤུངས་པ་མཚོ་སྐྱེས་རྡོ་རྗེ་དང་ཀརྨ་ཞྭ་དམར་སྐུ་ཕྲེང་བཞི་པ་ཆོས་གྲགས་ཡེ་ཤེས་གཉིས་ཀྱིས་སྤྱི་ལོ་1490ནས་1499བར་སྔ་རྗེས་སུ་ལོ་དགུའི་རིང་ལ་རྒྱལ་ཚབ་བྱས། དེ་ལ་བོད་ཀྱི་ལོ་རྒྱུས་ལས་དཔོན་ཚབ་ཐེལ་གཏོང་གི་དུས་སྐབས་ཟེར། དཔོན་ཚབ་ཐེལ་གཏོང་གི་དུས་སུ་དགེ་ལུགས་པའི་ལྷ་སའི་སྨོན་ལམ་ཆེན་མོར་བཀག་འགོག་བྱས་ཤིང་བཀའ་དགེ་བར་འགལ་བ་ཅུང་ཟད་བྱུང་། སྤྱི་ལོ་1499ལོར་ངག་དབང་བཀྲ་ཤིས་གྲགས་པས་སྲིད་སྐྱོང་གི་འགན་དངོས་སུ་བཞེས་ཏེ་དགེ་ལུགས་པའི་སྨོན་ལམ་ཆེན་མོ་བསྐྱར་གསོ་བྱས། སྤྱི་ལོ་1560ལོར་ངག་དབང་བཀྲ་ཤིས་གྲགས་པ་སྐུ་གཤེགས་པ་དང་ཁོང་གི་སྲས་སྤྱན་སྔ་གྲགས་འབྱུང་ལ་སྲིད་གཏད། སྤྱན་སྔ་གྲགས་འབྱུང་གིས་སྲིད་བཟུང་བའི་སྐབས་སུ་སྟེ་སྤྱི་ལོ་1619ལོར་ཀརྨ་ཕུན་ཚོགས་རྣམ་རྒྱལ་གྱིས་ཕག་གྲུའི་སྲིད་དབང་རྩ་གཏོར་བྱས་ཏེ་གཙང་པ་རྒྱལ་པོའི་སྲིད་དབང་བཙུགས། གཙང་པ་རྒྱལ་པོ་ནི་ཀརྨ་བཀའ་བརྒྱུད་པའི་ལུགས་ཡིན་པས་མཁས་པ་ལ་ལས་ཀརྨ་བཀའ་བརྒྱུད་ཀྱི་སྲིད་དབང་ཞེས་ཀྱང་བཏགས་ཡོད། གཙང་པ་རྒྱལ་པོས་སྲིད་དབང་བཟུང་རྗེས་དགེ་ལུགས་པར་ཤིན་ཏུ་སྡང་ཞིང་དབུས་གཙང་ཁུལ་དུ་དགེ་ལུགས་པའི་གྲུབ་མཐའ་སྤེལ་བར་མཐའ་གཅིག་ཏུ་བཀག་འགོག་བྱས་པས། སླད་པཎ་ཆེན་སྐུ་ཕྲེང་བཞི་པ་བློ་བཟང་ཆོས་རྒྱན་དང་རྒྱལ་དབང་སྐུ་ཕྲེང་ལྔ་བ་ངག་དབང་བློ་བཟང་རྒྱ་མཚོས་ལྐོག་ཏུ་སོག་པོ་ཧོ་ཐོག་ཐུ་གུ་ཧྲི་ཧན་ལ་འབྲེལ་བ་བྱས་པ་དང་། སྤྱི་ལོ་1647ལོར་གུ་ཧྲི་ཧན་གྱིས་སྣེ་དྲངས་པའི་སོག་དམག་དབུས་སུ་འབྱོར་ནས་དབུས་དམག་དང་དཔུང་བསྡེབས་ཏེ་གཙང་པ་རྒྱལ་པོའི་སྲིད་དབང་མགོ་རྟིང་སློག་ཅིང་དགའ་ལྡན་ཕོ་བྲང་གི་སྲིད་དབང་བཙུགས།

དགའ་ལྡན་ཕོ་བྲང་གི་སྲིད་དབང་བྱུང་བ་དང་བསྟུན་སྔར་དགེ་ལུགས་པ་དང་འགལ་བ་ལྟག་སྤྲོད་དུ་གྱུར་པའི་ས་གནས་སྲིད་དབང་དང་གྲུབ་མཐའ་དག་ལ་ངན་སྐྱེན་སློག་པ་སྟེ། སྤྱི་ལོ་1637ལོར་གུ་ཧྲི་ཧན་གྱིས་དཔུང་ཁྲིད་ནས་མཚོ་སྔོན་ཕྱོགས་ཀྱི་ཁར་ཁ་ཆོག་ཐུའི་སྲིད་དབང་གཏོར་པ་དང་སྤྱི་ལོ་1639ལོར་སྨར་ཁམས་སུ་དམག་བསྒྱུར་ནས་ཁམས་བེ་རི་རྒྱལ་པོའི་སྲིད་དབང་རྩ་གཏོར་བྱས། དེར་མཐུད་རིན་སྤུངས་པ་དང་གཙང་པ་རྒྱལ་པོས་སྔ་རྗེས་ཐེངས་གཉིས་ལ་དགེ་ལུགས་པར་གཉའ་མནོན་བཏང་བར། སྔར་གཙང་པ་རྒྱལ་པོ་དང་འབྲེལ་བ་ལེགས་པའི་ཇོ་ནང་བའི་དགོན་པ་དང་བཀའ་བརྒྱུད་ཀྱི་དགོན་པ་མང་པོ་དགེ་ལུགས་པར་བསྒྱུར་ཞིང་། ཀརྨ་བསྟན་སྐྱོང་དབང་པོའི་རྗེས་འབྲང་མཆོད་གཞིས་རྣམས་གཞུང་བཞེས་བྱས་ཏེ་དགའ་ལྡན་ཕོ་བྲང་གི་དཔོན་རིགས་དག་ལ་གནང་། སྤྱི་ལོ་1643ལོར་ཀརྨ་སྐུ་ཕྲེང་བཅུ་པའི་ཆོས་ཚོགས་འཛམ་གླིང་སྒར་ཆེན་ཞེས་པ་རྡུལ་དུ་བརླག དེ་ལྟར་བོད་ཁམས་ཡོངས་དགའ་ལྡན་ཕོ་བྲང་གི་མངའ་འོག་ཏུ་བཅུག་པ་དང་དགེ་ལུགས་པའི་གྲུབ་མཐའ་ནི་དབུས་ནས་འཕྲོས་ཏེ་བོད་སྤྱི་ལ་དར་ཁྱབ་དུ་བཏང་།

ཁམས་བེ་རི་རྒྱལ་པོའི་སྲིད་དབང་རྩ་གཏོར་བྱས་པ་དང་བསྟུན་ནས་ཁམས་ཀྱི་ཕྱོགས་སུ་དགེ་ལུགས་པའི་གྲུབ་མཐའ་སྤེལ་བ་ལ་རྒྱབ་འགལ་བྱེད་མཁན་མེད་པར་གྱུར། སྤྱི་ལོ་1682ལོར་བྲག་གཡབ་གྲགས་པ་རྒྱལ་མཚན་གྱི་སྤྲུལ་སྐུ་ངག་དབང་བསོད་ནམས་ལྷུན་གྲུབ་ཀྱིས་བྲག་གཡབ་བྱམས་མདུན་དགའ་ལྡན་བཤད་སྒྲུབ་ཆོས་འཁོར་གླིང་བཏབ་པ་དེས་བྲག་གཡབ་ཀྱི་ཕྱོགས་སུ་དགེ་ལུགས་པའི་གྲུབ་མཐའ་རྐང་ཚུགས། མཁར་ནག་ཆོས་འབྱུང་སོགས་ལས་སྨར་ཁམས་སྒང་དུ་རྗེ་ཙོང་ཁ་བའི་སློབ་བརྒྱུད་ཀྱིས་སྔར་ནས་དགེ་ལུགས་པའི་བསྟན་པ་སྤེལ་བར་གསུངས་ཡོད་མོད། སྨར་ཁམས་ཀྱི་ལོ་རྒྱུས་དང་བྲག་གཡབ་གྲགས་པ་རྒྱལ་མཚན་གྱི་རྣམ་ཐར དགའ་ལྡན་ཆོས་འབྱུང་བེེཌྱཱ་སེར་པོ་སོགས་ལས་རྒྱལ་དབང་ལྔ་པའི་ཞལ་སློབ་བྲག་གཡབ་གྲགས་པ་རྒྱལ་མཚན་གྱིས་སྤྱི་ལོ་1621ལོར་བྲག་གཡབ་བཀྲ་ཤིས་ཆོས་རྫོང་བཏབ་པ་ནི་བྲག་གཡབ་ཕྱོགས་ཀྱི་དགེ་ལུགས་པའི་ཆོས་སྡེ་ཐོག་མ་ཡིན་ལ། འོན་ཀྱང་དེ་ནི་རང་བཞིན་གྱི་ལྷ་ཁང་ཆུང་ངུ་ཙམ་ཞིག་མ་གཏོགས་མེད་པ་དང་། སྐབས་དེར་བྲག་གཡབ་ཕྱོགས་སུ་སྨར་ཚང་བཀའ་བརྒྱུད་དར་ཁྱབ་ཆེ་བ་དང་དེའི་གཞོགས་སུ་བེ་རི་རྒྱལ་པོས་སྲིད་ཤུགས་ལ་བརྟེན་ནས་བོན་ཆོས་སྤེལ་ཞིང་གྲུབ་མཐའ་གཞན་བཀག་འགོག་བྱེད་བཞིན་པས་དགེ་ལུགས་པའི་གྲུབ་མཐའ་དར་མ་ནུས། དེ་ཕུད་འགྲོ་མགོན་ཆོས་རྒྱལ་འཕགས་པས་ཕྱག་བཏབ་པའི་ས་སྐྱའི་དགོན་པ་ཞིག་ཀྱང་ཡོད་པ་བྲག་གཡབ་བླ་དགོན་གྱི་ལོ་རྒྱུས་དང་སྨར་ཚང་གི་རྣམ་ཐར་དག་ལས་གསལ།

དགེ་ལུགས་པའི་གྲུབ་མཐའ་སྨར་ཁམས་ཕྱོགས་སུ་སྤེལ་བ་དེས་སྨར་ཚང་བཀའ་བརྒྱུད་ལ་བགེགས་རྐྱེན་ཆེན་པོ་བཟོས་པ་སྟེ། སྨར་ཚང་བཀའ་བརྒྱུད་ཀྱི་རྣམ་ཐར་ཕྱོགས་སྒྲིག་ལས། “གོང་ས་ལྔ་བ་ངག་དབང་བློ་བཟང་རྒྱ་མཚོས་གངས་ཅན་གྱི་མངའ་བདག་མཛད་སྐབས་བྲག་གཡབ་བླ་མ་གྲགས་པ་རྒྱལ་མཚན་གྱི་ཡང་སྲིད་ངག་དབང་བསོད་ནམས་ལྷུན་གྲུབ་ལ་སྨར་ཚོང་ཉག་རེའི་སྡེ་འབང་ཐམས་ཅད་ཆོས་གཞི་དུ་སྩལ། དགེ་འདུན་སྡེ་འཁྲུགས་རྣམས་ཟླུམ་ནས།དབྱེན་ཟླུམ་དང་བྱམས་མདུན་ཆོས་སྡེ་བཏབ། ཅེས་པ་ལས་སྤྱི་ལོ་1682ལོར་བྲག་གཡབ་བྱམས་མདུན་དགའ་ལྡན་བྱང་ཆུབ་གླིང་མ་བཏབ་སྔོན་ནས་སྨར་ཚང་གི་ཆོས་སྡེ་ལ་གནོད་པ་ཚབས་ཆེན་བཟོས་ཡོད་པ་རྟོགས་ལ། རྒྱུ་མཚན་

ནི་རྒྱལ་དབང་ལྔ་བ་ནི་སྤྱི་ལོ་1680ལོར་སྐུ་གཤེགས་ཞེས་བོད་ཀྱི་ལོ་རྒྱུས་ཀུན་ལས་གསུངས་ཡོད་པས། རྒྱལ་དབང་ལྔ་བ་གཙོ་ཡིན་པའི་དགའ་ལྡན་ཕོ་བྲང་ཕྱོགས་ཁག་གིས་དེ་སྔོན་ནས་སྨར་ཚང་གི་བསྟན་པ་ལའང་བཀག་འགོག་བྱས་ཤིང་དེའི་མཆོད་གཞིས་རྣམས་གཞུང་བཞེས་བྱས་ཏེ་དགེ་ལུགས་པའི་བླ་སྤྲུལ་ངག་དབང་བསོད་ནམས་ལྷུན་གྲུབ་ལ་གནང་ནས་དགེ་ལུགས་པའི་གྲུབ་མཐའ་སྤེལ་བར་རྨང་གཞི་བརྟན་པོ་བཏིང་ཡོད་པ་དང་། མཐར་ལྔ་བ་མཆོག་གཤེགས་ནས་ལོ་གཉིས་ཀྱི་རྗེས་སུ་ངག་དབང་བསོད་ནམས་ལྷུན་གྲུབ་ཀྱིས་བྲག་གཡབ་དགའ་ལྡན་བྱང་ཆུབ་གླིང་ངམ་ངག་རྒྱུན་དུ་བྲག་གཡབ་བུ་དགོན་ཞེས་པའི་དགོན་སྡེ་བཏབ། ཡང་སྨར་ཚང་གི་མཆོད་གཞིས་བླངས་པ་དེས་སྨར་ཚང་གི་ཆོས་སྡེའི་འཚོ་རྟེན་བཅད་པས། སྨར་ཚང་བཀའ་བརྒྱུད་ཀྱང་ཟས་གོས་བྲལ་བའི་སྐྱེ་བོ་བཞིན་རིམ་བཞིན་ཉམས་ཤིང་རྒུད་པར་གྱུར། སྨར་ཚང་བཀའ་བརྒྱུད་པ་ཉམས་རྗེས་དཔལ་ཡུལ་དགོན་དུ་མཆེད་དེ་རྙིང་མ་དང་འདྲེས་ནས་ཕྱག་རྫོགས་མཉམ་འདྲེས་ཀྱི་ཆོས་བརྒྱུད་བྱུང་ཞེས་ལོ་རྒྱུས་ཡིག་ཆ་མང་པོར་བཀོད་ཡོད་མོད། འོན་ཀྱང་ཇི་ལྟར་འདྲེས་པ་དང་ཅིའི་ཕྱིར་འདྲེས་པའི་ཚུལ་ལ་ད་དུང་མཁས་པ་སུ་ཞིག་གིས་ཀྱང་གསུངས་མེད་ལ། འབྲེལ་ཡོད་ཀྱི་རྒྱུ་ཆའང་ལག་ཏུ་མ་སོན་པས་དེའི་སྐོར་ལ་དཔྱད་པའི་ངལ་བ་མི་བྱའོ།།

 

མཇུག་སྡོམ།

 

སྨར་ཚང་བཀའ་བརྒྱུད་ཅེས་པའི་ཆོས་བརྒྱུད་ཆེན་མོ་འདི་ནི་དུས་རབས་བཅུ་གཅིག་པའི་སྨད་ལ་སྨར་ཁམས་སུ་བྱུང་ཞིང་། རིམ་བཞིན་དུས་རབས་བཅུ་བདུན་པའི་བར་ཏེ་ལོ་ངོ་ལྔ་བརྒྱ་ཙམ་གྱི་རིང་ལ་བོད་ཀྱི་སྤྱི་ཚོགས་སུ་གནས་ཤིང་དར་རྒྱས་ཕྱིན། སྒོས་སུ་ས་ཕག་གཉིས་ཀྱི་རིང་ལ་ཁམས་ཀྱི་ས་ཆ་མང་པོར་དར་ཏེ་བོད་བརྒྱུད་ནང་བསྟན་གྱི་གྲུབ་མཐའ་སྤྱི་ལས་དར་ཁྱབ་ཆེས་ཆེ་བའི་གྲས་སུ་ཚུད། མཐར་དུས་རབས་བཅུ་བདུན་པར་དགའ་ལྡན་ཕོ་བྲང་གི་སྲིད་དབང་བྱུང་བ་ནས་བཟུང་ཉམས་རྒུད་དུ་གྱུར་པ་བཅས་དར་རྒུད་རིམ་པ་གསུམ་དུ་ཕྱེ་ཡོད། མདོར་ན་སྨར་ཚང་བཀའ་བརྒྱུད་དར་ནས་རྒུད་པར་གྱུར་བའི་རྒྱུ་གང་ལ་གཞིགས་ཀྱང་སྲིད་དབང་དང་མ་འབྲེལ་བ་ཞིག་མིན་ཏེ། ས་ཕག་དུས་སུ་ཡོན་གོང་མ་དང་མིང་གོང་མས་བོད་ཁམས་གཅིག་གྱུར་བྱེད་པ་ལ་དམིགས་ནས་སྨར་ཚང་ལ་རྒྱབ་སྐྱོར་བྱས་ཏེ་གྲུབ་མཐའ་སྤེལ་བ་དང་། དགའ་ལྡན་ཕོ་བྲང་གི་སྐབས་སུ་དགེ་ལུགས་པའི་གྲུབ་མཐའ་དར་སྤེལ་དང་སྲིད་དབང་གཅིག་གྱུར་ཡོང་བ་ལ་མ་འཚམས་པས་ཉམས་རྒུད་དུ་བཏང་བའོ།།སྨར་ཚང་བཀའ་བརྒྱུད་དར་རྒྱས་ཀྱི་ལོ་ངོ་ལྔ་བརྒྱའི་རིང་ལ་བོད་བརྒྱུད་ནང་བསྟན་དར་སྤེལ་བྱེད་པར་ནུས་པ་བླ་མེད་ཐོན་ཡོད་པ་དང་། ལྷག་དོན་འཇང་བོད་མཆོད་འབྲེལ་དང་སོག་བོད་མཛའ་འབྲེལ་གྱི་ཐད་ལ་འཕྱར་བ་གྲུ་འདེགས་ལྟ་བུའི་ནུས་པ་ཐོན་ཡོད་པ་ནི་སྨར་ཚང་ལོ་རྒྱུས་ལས་གསལ་པོར་མཐོང་བས། འདིས་བོད་ཀྱི་ལོ་རྒྱུས་སྟེང་གོ་གནས་ཆེན་པོ་བཟུང་ཡོད་པ་རྟོགས། དེ་བཞིན་འདི་ལྟ་བུའི་ཆོས་ལུགས་གྲུབ་མཐའ་མང་པོ་ཞིག་དེང་ཆར་ཉམས་ནས་ལོ་རྒྱུས་དེབ་ཐེར་དག་ལས་མིང་གི་ལྷག་མ་ཙམ་ལས་མེད་ཅིང་། མདོར་ན་དེ་དག་ཕལ་མོ་ཆེ་ནི་བོད་བརྒྱུད་ནང་བསྟན་གྱི་གྲུབ་མཐའི་ཆགས་སྡང་ལས་བྱུང་བའི་འབྲས་བུ་ཡིན་པ་ཤེས་ནུས་སོ།།

 

སྨར་ཚང་བཀའ་བརྒྱུད་ཀྱི་གདན་རབས་རེའུ་མིག

གདན་ས།

 

གདན་རབས།

 

ཤོ་དགོན་པ། 

 

འཁྲུངས་ཡུལ་དང་འཁྲུངས་འདས།

 

གདན་ས་བསྐྱངས་པའི་ལོ།

 

གསལ་བཤད།

ཙོམ་མདོ་དགོན་པ།

 

འཁྲུངས་ཡུལ་དང་འཁྲུངས་འདས།

 

གདན་ས་བསྐྱངས་པའི་ལོ།

 

གསལ་བཤད།

 

གདན་རབས་དང་པོ།

སྨར་པ་ཤེས་རབ་ཡེ་ཤེས།

 

སྨར་ཁམས་རུ་ཤོད་དགེ་རྒྱས་བྱེ་མ་ལོང་།སྤྱི་ལོ་1135-1203

 

1167-1200

 

མགོན་ནི་ཆེན་དཔལ།

 

འགྲོ་སྨར་ཁམས་སྟོད། སྤྱི་ལོ་1170-1249

1200-1244

ཁོང་གིས་ཤོ་དགོན་དང་ཙོམ་མདོ་གཉིས་ཀྱི་ཁྲི་པ་དུས་མཉམ་དུ་བཞེས།

གདན་རབས་གཉིས་པ།

འགྲོ་མགོན་རིན་

ཆེན་དཔལ། སློབ་དཔོན་གདན་ས་བ།

 

1200-1222

འགྲོ་མགོན་རིན་ཆེན་གྱི་རྣམ་ཐར་ལས་ཆོས་རྗེ་སྨར་པ་དགུང་ལོ་མཐོ་བས་ཁོང་ཤོ་དགོན་གྱི་ཁྲི་པར་བསྐོས་ཞེས་དང་། ཡང་དགོན་པའི་རྣམ་ཐར་ལས་ཆུ་རྟ་ལོར་སློབ་དཔོན་

གདན་ས་བ་གཤེགས་པས་ཡང་དགོན་གདན་

ས་བཀོད་ཅེས་པ་ལྟར་ན། འགྲོ་མགོན་ལོ་

གཅིག་གི་རྗེས་སུ་སློབ་དཔོན་གདན་ས་བས་

ལོ་ཉེར་གཉིས་ཙམ་ལ་བསྐྱངས་ཡོད།

ཚུལ་ཁྲིམས་

གཞོན་ནུ་

དཔལ།

སྨར་ཁམས་སྟོད་སྟག་

ར། སྤྱི་ལོ་1197-1276

1244-1272

ཁོང་གི་རྣམ་ཐར་ལས་དགུང་ལོ་དྲུག་ཅུའི་སྟེང་

དུ་ཁྲི་པ་དགོངས་པ་ཞུས་ཏེ་ཀརྨ་སེངྒེ་བསྐོས་

ཞེས་ཡོད་ལ། འོན་ཀྱང་ཀརྨ་སེངྒེ་ནི་དེ་དུས་

དགུང་ལོ་དགུ་ལས་མེད་པས་ཁྲི་པའི་འགན་

བཞེས་མ་ནུས། གོང་འོག་གི་ཁྲི་པའི་ལོ་གྲངས་

དང་སྦྱར་ཚེ་ཕལ་ཆེར་ལོ་ཉེར་བརྒྱད་ཙམ་ལ་

གདན་ས་བསྐྱངས་ཡོད།

གདན་རབས་

གསུམ་པ།

ཡང་དགོན་

ཡེ་ཤེས་རྒྱལ་མཚན།

སྨར་ཤོད་ཕོ་བྲང་

དགའ་སྡེ་སྟེང་།

སྤྱི་ལོ་1185-1245

1222-1241

 

ཀརྨ་སེངྒེ་

དཔལ།

རྒྱལ་མོ་རོང་།

སྤྱི་ལོ་1248-1301

1272-1301

 

གདན་རབས་

བཞི་པ།

སྤྱན་སྔ་བྱང་

ཆུབ་གྲགས།

ཟལ་མོ་སྒང་གི་སྟོད་

ཡོན་དམ་པ། སྤྱི་ལོ་

1218-1277

1241-1274

 

 

 

 

 

གདན་རབས་

ལྔ་པ།

དབུ་རྩེ་བསོད་

ནམས་ཡེ་ཤེས།

སྨར་ཤོད་རབ་གྲུབ

སྤྱི་ལོ་1243-1303

1274-1303

ཁོང་གི་རྣམ་ཐར་ལས་གདན་ས་ལོ་ག་ཚོད་

བསྐྱངས་པ་མི་གསལ། འཁྲུངས་འདས་དང་

གུང་སྒྲིག་ཚེ་ཕལ་ཆེར་ལོ་སོ་དགུ་ཙམ་ཡིན།

 

 

 

 

གདན་རབས་

དྲུག་པ།

རིན་ཆེན་གླིང་རིན་

ཆེན་རྒྱལ་མཚན།

སྨར་ཁམས་ཤར་

བརྒྱུད་འབྱོར་ལྡན་

སྡང་།

སྤྱི་ལོ་1266-1341

1303-1338

སྔ་ཕྱི་སྡོམས་

པའི་35

རྣམ་ཐར་ལས་བླ་མ་དབུ་རྩེ་བ་གཤེགས་རྗེས་

གདན་ས་བཟུང་ཞེས་ཡོད། ཤོ་དགོན་དང་

ཙོམ་མདོ་གཉིས་སུ་ལོ་སོ་དགུ་ཙམ་ལ་གདན་

ས་མཛད།

རིན་ཆེན་རྒྱལ་

མཚན།

སྤྱི་ལོ1278-1364 ་ཙོམ་

མདོ་གདན་རབས་དང་

སྨར་པ་བཀའ་བརྒྱུད་

ཀྱི་རྣམ་ཐར་སུ་ཁར་

རའྞ ་ིཕྲངེ ་བ་གཉསི ་ལས་

འཁྲུངས་འདས་ཀྱི་ལོ་

ཚིགས་མི་མཐུན།

 

འདི་དང་ཤོ་དགོན་གྱི་གདན་རབས་དྲུག་པ་

གཉིས་མི་གཅིག་ཡིན་པ་དང་། ཐོག་མར་ཤོ་

དགོན་དང་རྗེས་སུ་ཙོམ་མདོའི་ཁྲི་པ་བཞེས།

གདན་རབས་

བདུན་པ།

མཁན་ཆེན་འོད་

ཟེར།

ཚ་བ་སྒང་གི་ཚ་བ་

ཁབ་པོ་རྒྱལ་མོའི་

ཞོལ་ཤོད། སྤྱི་ལོ་

1295-1376

1338-1373

 

 

 

 

 

གདན་རབས་

བརྒྱད་པ།

ཤིང་འགོ་བ་དཀོན་

ཆོག་རྒྱལ་མཚན།

སྨར་ཁམས་སྒང་ཟླ་

རྩིབ། སྤྱི་ལོ་1340-

1417

1373-1414

 

 

 

 

 

གདན་རབས་

དགུ་པ།

ཡེ་ཤེས་དབང་ཕྱུག

མི་གསལ།

 

ཙོམ་མདོའི་ཁྲི་པ་དཀོན་མཆོག་རྒྱལ་མཚན་གྱི་

རྣམ་ཐར་ལས་གསལ། ཁོང་གི་རྣམ་ཐར་མི་

གསལ།

དཀོན་མཆོག་

རྒྱལ་མཚན

སྨར་ཁམས་ནུབ་བརྒྱུད།

སྤྱི་ལོ་1364-1421

1379-1394

 

གདན་རབས་

བཅུ་པ།

ནམ་མཁའ་སེངྒེ

མི་གསལ།

 

ཙོམ་མདོའི་ཁྲི་པ་དཀོན་མཆོག་རྒྱལ་མཚན་གྱི་

རྣམ་ཐར་ལས་གསལ། ཁོང་གི་རྣམ་ཐར་མི་

གསལ།

དཀོན་མཆོག་

འཇིགས་མེད།

དཀོན་མཆོག་

ཉི་མ།

མི་གསལ།

 

དཀོན་མཆོག་རྒྱལ་མཚན་གྱི་རྣམ་ཐར་ལས་

ཁྲི་པ་དགོངས་ཞུས་ཏེ་རྗེ་འདི་ཁྲི་པར་བསྐོས་

ཞེས་བཀོད་ཡོད། ཡང་ཁྲི་རབས་བཅུ་གཉིས་

དཀོན་མཆོག་རྡོ་རྗེའི་རྣམ་ཐར་ལས་ཙོམ་

མདོའི་ཁྲི་རབས་བཅུ་བ་དཀོན་མཆོག་ཉི་མ་

ཞེས་མཚན་བཀོད་ཡོད། ཁོང་གཉིས་ཀྱི་རྣམ་

ཐར་མི་གསལ།

གདན་རབས་

བཅུ་གཅིག

ཡེ་ཤེས་རྒྱལ་

མཚན།

མི་གསལ།

 

ཙོམ་མདོའི་ཁྲི་པ་དཀོན་མཆོག་རྡོ་རྗེའི་རྣམ་

ཐར་ལས་གསལ། ཁོང་གི་རྣམ་ཐར་མེད།

 

 

 

 

གདན་རབས་

བཅུ་གཉིས།

ཡེ་ཤེས་རྡོ་རྗེ།

མི་གསལ།

 

ཙོམ་མདོའི་ཁྲི་པ་དཀོན་མཆོག་རྡོ་རྗེའི་རྣམ་

ཐར་ལས་གསལ། ཁོང་གི་རྣམ་ཐར་མེད།

དཀོན་མཆོག་

རྡོ་རྗེ།

རྒྱལ་མོ་རོང་དུང་རྡ་

སྤྱི་ལོ1437-1498

1489-1498

 

གདན་རབས་

བཅུ་གསུམ།

 

 

 

 

དཀོན་མཆོག་

བསོད་ནམས།

མི་གསལ།

 

དཀོན་མཆོག་རྡོ་རྗེའི་རྣམ་ཐར་ལས་ཁྲི་པའི་

དགོངས་ཞུས་མཛད་དེ་རྗེ་འདི་ཁྲི་པར་བསྐོས་ཞེས་

བྲིས་ཡོད། ཁོང་གི་རྣམ་ཐར་མི་གསལ།

གདན་རབས་

བཅུ་བཞི།

དཀོན་མཆོག་ངག་

དབང་།

མི་གསལ།

 

ཙམོ ་མདོའི་ཁྲི་པ་བྱང་ཆུབ་སེངྒེ་དཔལ་གྱི་རྣམ་

ཐར་ལས་གསལ། ཁོང་གི་རྣམ་ཐར་མི་གསལ།

 

 

 

 

གདན་རབས་

བཅོ་ལྔ།

 

 

 

 

བྱང་ཆུབ་སེངྒེ་

དཔལ།

སྨར་སྟོད་ཁྱུང་འབུམ་

ཡུག སྤྱི་ལོ1510-1571

1553-1560

 

གདན་རབས་

བཅུ་དྲུག

 

 

 

 

མཁྱེན་རབ་

དབང་ཕྱུག

མི་གསལ།

 

ཁྲི་པ་བྱང་ཆུབ་སེངྒེའི་རྣམ་ཐར་ལས་ཁྲི་ པ་དགོངས་ཞུས་བྱས་ཏེ་རྗེ་འདི་ཁྲི་པར་བསྐོས་ཞེས་

བཀོད་ཡོད། ཁོང་གི་རྣམ་ཐར་མི་གསལ།

གདན་རབས་

བཅུ་བདུན།

 

 

 

 

བཀྲ་ཤིས་རྒྱ་

མཚོ།

མི་གསལ།

 

ཁྲི་པ་བྱང་ཆུབ་སེངྒེའི་རྣམ་ཐར་ལས་གསལ།

ཁོང་གི་རྣམ་ཐར་མི་གསལ།

 

( རྩོམ་སྒྲིག་འགན་ཁུར་བ་ནོར་བུ་ཚེ་རིང་།)

བཀའ་འབུམ་རྒྱལ།  ད་ལྟ་ལྷོ་ནུབ་མི་རིགས་སློབ་གྲྭ་ཆེན་མོའི་2012ལོའི་ཀྲུང་གོའི་གྲངས་ཉུང་མི་རིགས་ལོ་རྒྱུས་ཆེད་ལས་ཀྱི་འབུམ་རམས་པའི་སློབ་མ་ཡིན།

中国藏文学术期刊网
中国藏学研究中心版权所有,未经允许不得转载使用
地址:北京市朝阳区北四环东路131号  邮编:100101